Матилда Лојд

Во 2026 година, Матилда стана првата трубачка која ја добила наградата за млад уметник на Кралското филхармониско друштво (Royal Philharmonic Society Young Artist Award). Признанието ѝ беше доделено за нејзината блескава музикалност, позитивната енергија што ја зрачи во сè што работи, како и за нејзината посветеност да ги инспирира младите да се занимаваат со музика. Списанието BBC Music Magazine ја опиша како „трубачка од исклучителен формат“. Матилда е впечатливо присуство на современата класична музичка сцена, освојувајќи ја публиката со беспрекорниот тон и виртуозното владеење со трубата, а истовремено придонесувајќи во создавањето на новите генерации класични музичари преку својата педагошка дејност како професорка по труба во Лондон. Сезоната 2026/27 за Матилда го носи нејзиниот деби-настап во Канада, каде што ќе го изведе Концертот за труба од Џон Вилијамс со Оркестарот „Метрополитен“ и диригентката Стефани Чајлдрес во Монтреал. Следуваат и концертни настапи со Симфонискиот оркестар на Лахти и диригентката Барбара Драган во Финска, со Симфонискиот оркестар на градот Бирмингем под диригентство на Казуки Јамада, како и со оркестрите Hallé и Royal Northern Sinfonia во Обединетото Кралство, под диригентство на Кристијан Салинен. Во октомври Матилда подготвува динамична програма што се протега од Хиндемит до Гершвин, која ќе ја изведе со ансамблот Ensemble 360 во рамките на концертната серија Music in the Round во Шефилд. Во пролетта следува турнеја низ Италија и Холандија со барокна програма, заедно со ансамблот Concerto di Cavalieri. Нејзините камерни музички соработки повторно ќе ја одведат во Вигмор Хол во Лондон и во Бриџвотер Хол во Манчестер, каде што ќе настапи со квартетот Goldmund. Во мај 2027 година Матилда ќе реализира турнеја во Холандија со ансамблот The Gesualdo Six. На програмата ќе биде музика од нивниот албум „Radiant Dawn“, објавен за издавачката куќа Hyperion во август 2025 година, кој во критиката на BBC Music Magazine беше оценет со пет ѕвезди и опишан како „инвентивен“. Во 2027 година Матилда ќе го има и својот деби-настап на фестивалот Kissinger Sommer, откако во 2026 година за првпат настапи на фестивалите Schleswig-Holstein, Zagreb Classic и Bregenz Summer Festival. Меѓу значајните моменти од сезоната 2025/26 се издвојува и нејзината прва турнеја во Азија, со настапи со Корејскиот национален симфониски оркестар под диригентство на Лоренс Ренес, како и изведбите на Концертот за труба „night-sky-blue“ од Хелен Грајм на фестивалот Gaida во Вилнус и со Националниот оркестар на Би-би-си на Велс. Во мај 2027 година Chandos Records ќе го објави нејзиниот следен проект – снимка на Концертот бр. 1 за пијано, труба и гудачки инструменти од Дмитриј Шостакович, со пијанистот Федерико Коли, диригентот Дима Слободениук и Бергенската филхармонија. Нејзината високо ценета дискографија за Chandos ја одразува нејзината смела уметничка визија и широкиот репертоарски опсег. Меѓу изданијата се издвојува нејзината „впечатлива нова интерпретација“ на Концертот за труба од Мечислав Вајнберг, објавена на албумот „Resonance“ со Лондонскиот симфониски оркестар во 2024 година, за која Gramophone Magazine даде особено позитивна оценка. На албумот „Casta Diva“, снимен со Britten Sinfonia во 2023 година, Матилда интерпретира италијански оперски арии. Нејзиното издание „Fantasia“ за труба и орган, објавено во септември 2025 година, ги поврзува новите транскрипции на барокна музика од Бах, Кребс и Мартини со четири нови дела нарачани од водечки британски композитори. Посветеноста на Матилда кон современата музика се огледа и во создавањето на нови концерти за труба, меѓу кои „LUCK“ од Робин Хејг, нарачан во рамките на заедничка иницијатива на фестивалот Алдебург и оркестарот Ulster Orchestra во 2024 година. Во моментов се работи и на уште два нови концерта за труба. Матилда е исклучително посветена на развојот и охрабрувањето на новата генерација музичари, како и на создавањето заедница во која музиката се доживува како простор за самоизразување, заедништво и радост. Покрај настапите ширум светот, таа одржува мајсторски курсеви на водечки музички конзерваториуми и универзитети, ги менторира младите британски дувачки музичари преку програмата Future Talent и, како амбасадорка на хуманитарната организација Brass for Africa, ја поддржува употребата на музиката како средство за општествена промена во Кампала, Уганда. Покрај техничката извонредност, Матилда подеднакво внимание посветува на менторството и педагошката работа, особено во своите улоги како професорка по труба на Trinity Laban Conservatoire во Лондон и како раководителка на одделот за труба во програмата OAcademy Global Artist Diploma, наменета за млади професионални музичари во развој. Матилда дипломирала на Trinity College, Кембриџ, и на Кралската академија за музика, а потоа се усовршувала кај Хокан Харденбергер на Академијата за музика во Малме. Во 2014 година ја освоила првата награда во дувачката категорија на натпреварот BBC Young Musician, а две години подоцна го имала својот солистички дебитантски настап на BBC Proms, со диригентот Алпеш Чаухан и Филхармонискиот оркестар на Би-би-си. Матилда е добитничка на повеќе награди на меѓународни натпревари, меѓу кои и првата награда на Меѓународниот натпревар за труба „Ерик Обије“ во Руан, Франција, во 2017 година. Во сезоната 2024/25, Матилда беше номинирана од Barbican и Konserthuset Stockholm за престижната титула ECHO Rising Star. Во рамките на оваа програма одржа 18 концерти на најзначајните европски концертни сцени, меѓу кои Concertgebouw во Амстердам, Wiener Musikverein во Виена и Elbphilharmonie во Хамбург. Во 2026 година Матилда беше одликувана со титулата Associate of the Royal Academy of Music (ARAM), како признание за нејзиниот значаен придонес кон музичката професија. Денес Матилда живее и работи во Берлин и е Yamaha Artist.  

Назад